عبر صفحته على "فيسبوك"، أعلن مقدّم البرامج في قناة "ام تي في"، ومقدّم فقرة Connected جيري غزال، خبر نجاته من عملية الدهس الارهابية التي وقعت ليل الخميس في نيس، والتي أدت إلى مقتل 84 شخصاً.
وأكد جيري أنه بخير، وأنه لم يكن قريباً من مكان وقوع الحادث الارهابي بل كان بين المصابين، مستلقياً على الارض، خوفاً من ان تصيبه رصاصات سائق الشاحنة الارهابي، ونشر غزال عبر صفحته على "فيسبوك"، رسالة مؤثرة ومبكية جاء فيها:
"صرلي كل الليل برجع بسمع صوت الطلقات، صوت صريخ الناس، صوت خيي عم بيصرّخ ت اركض واتخبّا، صوتي عم عيّط للعدرا، صرلي كل الليل برجع بشم ريحة الارض اللي كنّا نايمين عليها، ريحة الناس اللي كانو نايمين حدنا حتى ما ينصابو، صرلو المشهد كل الليل بِعيد براسي، تفاصيل مرعبة، تعابير وجوه مرعوبة، بلحظة كان فيي اخسر كل شي متل ما اكتر من 80 شخص من يللي كانو حدّي خسرو وخسّرو".
وأضاف: "بتفكرو هيك اشيا ما بتصير الّا عالأخبار وبالأفلام، بس لمّا تلاقو حالكن عم تتخبّو حتى ما حدا يقوّصكن، حتى ما تموتو، بتستوعبو هالعالم قدّيش في يكون بشع اوقات، وقديش في يكون مجرم وظالم. صرلي كل الليل بسأل حالي ليش، ليش انا، ليش هنّي، ليش جيت من بلد معقول يقتلني، لبلد لولا القدرة الإلاهية، كان قتلني وصيّرني جثّة عالارض مغطيينا بشرشف ابيض، وخلص كل شي".
وتابع غزال: "صرلي كل الليل بتخايل الاحتمالات اللي ما صارت، صرلي كل الليل بعيد دقيقة كنّا ناطرين اذا رح نعيش بعدا ولّا لاء وما كانت تعرف تخلص. الحياة شو رخيصة، بتقضّيا عم تحلم وتعمّر، حتى بلحظة كلّو ينهار قدّام عيونك بموتة ولا ارخص. يا رب في ناس بريئة كانت رايحة تفرح مع ناس بتحبّن، متل ما انا رحت، سمعتن عم بيصَرخو يا قبل ما يموتو، يا حتّى ما يموتو. شو هالعالم يا الله؟ كيف تاركو هيك؟ انا انكتبلي عمر جديد، وراح قدّام عيوني اعمار كتيرة، ما لازم شك بحكمتك يا رب، ما لازم اسأل ليش، بس اليوم بالذات ما عبالي غير اني افهم".
